Жаңашыл кәсіби бағдар
Күзгі вальс
Табиғат жаратылысы өзінің сұлулығымен, күрең күз жылуымен адам баласына ерекше әсер беретін мезгіл – күз. Аталмыш мезгілдің алғашқы қыркүйек айының 28-і күні біздің жатақханамызда тәрбиешілер мен өнерлі, өрелі оқушыларымыздың ұйымдастыруымен «Күзгі вальс» атты кеш өтті.
Кешіміздің негізгі мақсаты мен жоспары толықтай орындалды. Дәлірек айтқанда, оқушылар 5 жұпқа бөлініп, өз өнерлерін көрсетті. Бұл кешіміздің көңілге жылу ұялататын нәтижесі 5 жұптың ішінен іріктеліп, дарабоз бола білген «Күз ханзадасы мен ханшайымы» номинациясының иегерлері: Хабдразаков Кеңесары мен Баймагамбетова Айшаны шын жүректен құттықтаймыз.
Оқушыларды ауызбіршілікке, жақсылыққа, өнерге баулыйтын «Күзгі вальс» кеші дәстүр болып қалыптасып, жылдан жылға жалғасын табатынына кәміл сенемін.
Тулеуова Ф.Ж.,
Tәрбиеші.
Тілек алқасы
Психологиялық қызметкерлердің ұйымдастыруымен жатақханамызда 20-сәуір күні «Тілек алқасы» атты психологиялық науқан өтті. Бұл науқанның мақсаты балалардың бір-біріне деген адамгершілік қарым-қатынасын, ізгі тілектері мен мейірім махаббатын жақсарту, аңқылдаған ақ жүректерінің тазалығын және бір-біріне деген сенімін арттыру. Науқан барысында балалар бірінің мойнындағы алқадан бір жіпті алып, келесі баланың мойнына байлап жатып, ішіндегі ақ тілегін ақтарды. Бұл әрекеттерімен олар адам баласының бойында азайып бара жатқан мейірбандық пен ізгіліктің, күнделікті күйбең тіршіліктің құрсауында жүріп, бір-біріне бір ауыз жылы сөз айтуға бөлінбеген уақыттың қадірін түсінгендей. Алқа арқылы тұла бойларында жасырынып жатқан ұлы сезім оянып, балалардың бір-біріне жақындаса түсуі, бұрын соңды айтылмаған ізгі тілектердің таңдайларынан тамшылауы ерекше әсер қалдырды.
Науқанымызға жатақхананың меңгерушісі, аз уақыттың ішінде балалардың екінші анасындай болып кеткен Әсия Айдарханқызы да қатысты.
«Бүгін мен ерекше сыйлық алдым. Бұл менің ең қымбат деген алқаларымның бірі, себебі бұл алқа ең жақсы көңілден шыққан сөздерден тұрады», – деп тілегін білдірді.
Айтылған барлық жақсы тілектерден мол күш-қуат алып, жақсы көңіл-күйге бөлендік.
Тулеуова Ф.Ж.
Тәрбиеші