Бүгін Назарбаев Зияткерлік мектептерінің оқушыларын Көкшетау қаласындағы физика-математика бағытындағы NIS жылы қарсы алды. Оқу ордамызда 13-16 маусым аралығында «Young Explorers-2022» зерттеу курсы өтеді. Курсқа еліміздің Назарбаев Зияткерлік мектептерінің 8-9 сынып оқушылары мен мұғалімдері қатысады.
Курс жетекшісі – «National Geographic Society» жанындағы мұғалімдердің Консультативтік кеңесінің мүшесі Алисия Прэссел.
Бүгін қатысушыларға команда құру тренингі ұйымдастырылды, футболдан және волейболдан достық кездесу, сондай-ақ, «Бір әннің тарихы» ән кеші және би кеші өтті.
Маусымның 13-і «Young Explorers-2022» зерттеу курсының салтанатты ашылу рәсімі өтеді. Оқушылар «Табиғатты аялайық» экологиялық акциясына, «Зияткер, алға!», «Көкшетау» ойындарына және «Старт-Азарт» спорттық эстафетасына қатысады.
Курс барысында қатысушылар Щучье – Бурабай курорттық аймағына, Мәлік Ғабдуллин атындағы мұражайға экскурсияға шығып, түрлі мәліметтер мен деректер жинайды.
Зерттеу курсының әр күнінің жаңалығын Көкшетау NIS сайтынан және әлеуметтік желілердегі парақшалардан бақылай аласыз!